18
oct

Volucraire - texte écrit en juin 2006

Archive:

 

 

Le vautour : Vultur. Ysidore. Vultur ou Vaultour, ainsi nommé pour son vol tardif et pour la grandeur de son corps, il n'a point vol hatif. On dit qu'il vit jusques a cent ans. Les vaultours sentent les charoignes oultre la mer comme les aigles, ilz vollent moult hault tant qu'ilz voyent les choses mussees par l'obscurté des montaignes. Ambroise. On dit que les vaultours conçoivent et engendrent sans cohit, ilz ont aussi acoustumé de anoncer la mort des hommes par aucuns signes. Quant il est a advenir une grant et larmoiable bataille, les vaultours suivent a grant compaignie, et par ce signifient qu'il y aura grant multitude d'hommes mors en guerre qui leur sera en proye. La glose sur le Levitique. La loy deffend manger de vaultour qui se resjoyst de batailles et de mors. Phisiologue. Le vaultour se siet en ung lieu tres hault car il se retarde en montant de la terre, et monte si tres hault qu'il voit les lieux loingtains. Pource on dit que le vaultour seul est l'oyseau de Dieu, lequel poursuit les plus grans oyseaulx de proye. Aristote. Le vaultour est pesant et de maulvaise coustume, flamelique et grant cryeur. Il chasse en lieux moult loingtains de son nid, il va monte en lieu tres hault, et se assiet illecques, car l'elevacion de la terre est moult difficile. On dit que luy seul il est oyseau qui prent les lievres et les petis cerfz, les chievres, les regnars et les autres bestes qu'il peut retenir. Luy mesmes. Le vaultour fait son nid en lieux tres haultains, et souvent sur les arbres. Il a envye de ses petis quant ilz engraissent, et ne les paist si non des demourans de sa viande, en les chassant avant qu'ilz puissent voller, mais il y a ung autre oyseau qui apres qu'il les a chassé les nourrist avecques les fiens. Une paire de vaultours occupe ung grant lieu, et pour ce il ne permect point ung autre faire son nid avec luy. Il est de longue vie, ce qui est congneu, car son nid demoure tousjours ung. Et quant il devient vieil son bec se aslonge en hault et se fait a maniere d'arc, et en la fin meurt de faim. Les operacions de Vaultour. Esculapius. Les pennes d'ung vaultour bruslees chassent les serpens hors de la maison. Son gesier broyé avecques sang, et beu par dix jours, guerist de maladie caduque. Son sang avec jus de Marrubrium guerist l'obscureté des yeulx. Son sain guerist la douleur des yeulx et evacue la douleur des nerfz. Diascorides. La fiente d'icelluy est medicinale, car elle boute hors la secondine. Pline au livre XIX. L'amer du vaultour destrempé de eaue guerist les blancheurs des yeulx. F La penne du vaultour, si on en nectoye ses dens, elle fait l'alayne aigre.

11:40 18/10/2013 | Lien permanent | Tags : textes |  Facebook

Les commentaires sont fermés.